Fact Check: പവാറിന്റെ വിമാനം തകരുന്നതായ വൈറൽ വീഡിയോ തെറ്റിദ്ധരിപ്പിക്കുന്നത്; സംഭവം വെനിസ്വേലയിലേതെന്ന് കണ്ടെത്തി

ന്യൂഡൽഹി (വിശ്വാസ ന്യൂസ്). റൺവേയിലൂടെ ടേക്ക് ഓഫ് ചെയ്യുന്നതിനിടെ ഒരു ചെറിയ വിമാനം തകർന്നുവീഴുന്ന ഭീതിജനകമായ ഒരു വീഡിയോ സോഷ്യൽ മീഡിയയിൽ  വൈറലാകുകയാണ്. മഹാരാഷ്ട്ര ഉപമുഖ്യമന്ത്രി അജിത് പവാറിന്റെ വിമാനം  തകരുന്ന വീഡിയോ എന്ന് അവകാശപ്പെട്ടുകൊണ്ടാണ് ഇത് ഷെയർ ചെയ്യപ്പെടുന്നത്.

Fact Check: പവാറിന്റെ വിമാനം തകരുന്നതായ വൈറൽ വീഡിയോ തെറ്റിദ്ധരിപ്പിക്കുന്നത്; സംഭവം വെനിസ്വേലയിലേതെന്ന്  കണ്ടെത്തി Fact Check: Viral Video Of Ajit Pawar’s Plane Crash Is Misleading; Incident Traced To Venezuela

 എന്നാൽ, ഈ അവകാശവാദം തെറ്റിദ്ധരിപ്പിക്കുന്നതാണെന്ന് വിശ്വാസ ന്യൂസ് നടത്തിയ അന്വേഷണത്തിൽ കണ്ടെത്തിയിരിക്കുന്നു. വൈറലായ വീഡിയോ ഇന്ത്യയിലേതല്ല, മറിച്ച് 2025 ഒക്ടോബറിൽ വെനിസ്വേലയിൽ സംഭവിച്ചതാണ്.ബാരാമതിയിൽ ലാൻഡിംഗിനിടെ വിമാനം തകർന്ന്  മഹാരാഷ്ട്ര ഉപമുഖ്യമന്ത്രി അജിത് അവാറും കൂടെയുള്ള അഞ്ചുപേരും പെട്ടു എന്ന വാർത്ത സത്യമാണെങ്കിലും  വീഡിയോ ആ ദുരന്തവുമായി ബന്ധപ്പെട്ടതല്ല.

വൈറൽ പോസ്റ്റിൽ  ഉള്ളത്?

 ‘Sarkari Jijaji’ (Archive) എന്ന ഫേസ്ബുക്ക് ഉപയോക്താവ് അജിത് പവാറിന്റെ വിമാനാ അപകടം എന്ന പേരിൽ  2026 ജനുവരി 28-നാണ് വൈറൽ വീഡിയോ  പങ്കുവെച്ചത്. എന്നാൽ, വീഡിയോയുടെ യാഥാർത്ഥ്യം സ്ഥിരീകരിക്കാൻ കഴിയില്ലെന്ന് ഉപയോക്താവ് തന്നെ ഒരു ഡിസ്ക്ലെയിമറും ചേർത്തിരുന്നു. ക്യാപ്ഷനിൽ ഇങ്ങനെ എഴുതിയിരുന്നു: “ഉപമുഖ്യമന്ത്രി അജിത് പവാറിന്റെ വിമാനാപകടത്തിന്റെ ഒരു വീഡിയോ പുറത്തുവന്നിട്ടുണ്ട്. ഈ വീഡിയോ യഥാർത്ഥമാണോ അല്ലയോ എന്ന് ഞങ്ങൾക്ക് സ്ഥിരീകരിക്കാൻ കഴിയില്ല.”

അന്വേഷണം 

അന്വേഷണ തുടക്കത്തിൽ ബന്ധപ്പെട്ട കീവേഡുകളും പ്രധാന ഫ്രെയിമുകളും ഉപയോഗിച്ച് ഞങ്ങൾ ഗൂഗിൾ ലെൻസ് തിരച്ചിൽ നടത്തി. തിരച്ചിലിനിടെ 2025 ഒക്ടോബറിലെ ‘മിറർ’, ‘ഇന്ത്യ ടുഡേ’, ‘മണികൺട്രോൾl’ തുടങ്ങിയ മാധ്യമങ്ങളിലെ റിപ്പോർട്ടുകൾ കണ്ടെത്തി; അവയിൽ ഇതേ വൈറൽ ദൃശ്യങ്ങൾ ഉൾപ്പെടുത്തിയിരുന്നു. റിപ്പോർട്ടുകൾ പ്രകാരം സംഭവം വെനിസ്വേലയിലെ ടാചിറ സംസ്ഥാനത്തെ ‘പരമില്ലോ വിമാനത്താവളത്തിൽ’ നടന്നതാണ്. 2025 ഒക്ടോബർ 23-ന് സ്വകാര്യ പൈപ്പർ ചെയെൻ വിമാനം ടേക്ക് ഓഫ് ചെയ്യുന്നതിനിടെ തകർന്നുവീണ് രണ്ട് ക്രൂ അംഗങ്ങൾ മരിച്ചിരുന്നു.

അജിത് പവാറിന്റെ വിമാനത്തിന് എന്താണ് സംഭവിച്ചത്?

 2026 ജനുവരി 28 ബുധനാഴ്ച രാവിലെ ഏകദേശം 8:45ഓടെ മഹാരാഷ്ട്ര ഉപമുഖ്യമന്ത്രി അജിത് പവാർ വിമാനാപകടത്തിൽ മരണപ്പെട്ടു. മുംബൈയിൽ നിന്ന് ബാരാമതിയിലേക്ക് യാത്ര ചെയ്യുന്നതിനിടെ അദ്ദേഹത്തിന്റെ ചാർട്ടേഡ് വിമാനം (Learjet 45, രജിസ്ട്രേഷൻ VT-SSK) ബാരാമതി വിമാനത്താവളത്തിൽ ലാൻഡിംഗിനിടെ തകർന്നു. DGCA യും പോലീസും നൽകിയ റിപ്പോർട്ടുകൾ പ്രകാരം അജിത് പവാറും, അദ്ദേഹത്തിന്റെ പി.എസ്.ഒ വിദീപ് ജാധവ്, അറ്റൻഡന്റ് പിങ്കി മാലി, മറ്റു രണ്ടു പൈലറ്റുമാർ അടക്കം ആകെ അഞ്ച് പേർ അപകടത്തിൽ മരണപ്പെട്ടിട്ടുണ്ട്.

വൈറൽ വീഡിയോയുടെയും ബാരാമതി അപകടത്തിന്റെയും ഇടയിൽ ശ്രദ്ധേയമായ ഭൗമശാസ്ത്ര വ്യത്യാസങ്ങൾ കാണാവുന്നതാണ്. വൈറൽ വീഡിയോയിൽ ഉയരവും സാന്ദ്രതയുമുള്ള മലനിരകൾ വ്യക്തമായി കാണുമ്പോൾ, ബാരാമതി വിമാനത്താവളത്തിന് ചുറ്റുമുള്ള പ്രദേശം മലനിരകളുള്ളതല്ല.

വൈറൽ വീഡിയോയിൽ വിമാനം ടേക്ക് ഓഫ് ചെയ്യുന്നതിനിടെ തകരുന്നതാണെങ്കിൽ,  പവാറിന്റെ വിമാനം കനത്ത മൂടൽമഞ്ഞിനിടെ ലാൻഡിംഗിനിടെ തകർന്നതാണ്.

ഇത് സംബന്ധിച്ച് കൂടുതൽ അറിയുവാൻ മുംബൈയിലെ മിഡ് ഡേ പത്രത്തിന്റെ സീനിയർ റിപ്പോർട്ടർ സാമിയുള്ള ഖാനെ ഞങ്ങൾ ബന്ധപ്പെട്ടു. അദ്ദേഹം ഇങ്ങനെ ഉറപ്പിച്ചു പറഞ്ഞു: “അജിത് പവാറിന്റെ വിമാനാപകടമാണെന്ന് സോഷ്യൽ മീഡിയയിൽ പ്രചരിക്കുന്ന വീഡിയോ പൂർണ്ണമായും തെറ്റിദ്ധരിപ്പിക്കുന്നതാണ്. ആ ദൃശ്യങ്ങൾ ബാരാമതിയിലേതല്ല. ബാരാമതിയിലെ അപകടം ലാൻഡിംഗിനിടെ നടന്നതാണ്, എന്നാൽ വൈറൽ വീഡിയോയിൽ വിമാനം ടേക്ക് ഓഫ് ചെയ്യുന്നതിനിടെ തകർന്നു വീഴുന്നതായിട്ടാണ് കാണുന്നത്.”

വൈറൽ പോസ്റ്റ് പങ്കുവെച്ച ‘Sarkari Jijaji’ എന്ന ഫേസ്ബുക്ക് ഉപയോക്താവിന് 4000-ലധികം ഫോളോവേഴ്സ് ഉണ്ട്.

ഫലം: മഹാരാഷ്ട്ര ഉപമുഖ്യമന്ത്രി അജിത് പവാറിന്റെ വിമാനാപകടമെന്ന് ആരോപിച്ച് വൈറലായ വീഡിയോ യഥാർത്ഥത്തിൽ വെനിസ്വേലയിലേതാണെന്ന് വിശ്വാസ ന്യൂസ് നടത്തിയ അന്വേഷണത്തിൽ കണ്ടെത്തി. 2026 ജനുവരി 28-ന് ബാരാമതിയിൽ വിമാനാപകടത്തിൽ അജിത് പവാർ മരിച്ചത് ദുഃഖകരമായ സത്യമായിരുന്നുവെങ്കിലും, സോഷ്യൽ മീഡിയയിൽ പ്രചരിക്കുന്ന വൈറൽ വീഡിയോ 2025 ഒക്ടോബറിൽ വെനിസ്വേലയിലെ ടാചിറയിൽ നടന്ന സംഭവത്തിന്റേതാണ്.

ടാഗ്സ്

• Ajit Pawar
• Ajit Pawar’s Plane Crash
• venezuela