Fact Check: मद्याच्या ग्लासासह नाचणारा व्यक्ती राम मंदिर ट्रस्टचे नवे CEO जितेंद्र मिश्रा नाहीत, व्हायरल दावा चुकीचा आहे.

नवी दिल्ली (विश्वास न्यूज). अयोध्येच्या ‘श्रीराम जन्मभूमी तीर्थ क्षेत्र ट्रस्ट’चे नवे CEO म्हणून भारतीय हवाई दलाचे माजी एअर मार्शल जितेंद्र मिश्रा यांची नियुक्ती करण्यात आली आहे. याच्याशी जोडून एका व्यक्तीचा व्हिडिओ सोशल मीडियावर वेगाने व्हायरल होत आहे. या व्हिडिओमध्ये एका व्यक्तीला मद्याचा ग्लास डोक्यावर ठेवून नाचताना आणि आनंदोत्सव साजरा करताना दिसत आहे. हा व्हिडिओ शेअर करून दावा केला जात आहे की, या व्हिडिओमध्ये दिसणारी व्यक्ती जितेंद्र मिश्रा आहेत.

विश्वास न्यूजने आपल्या तपासात आढळले की हा व्हायरल दावा चुकीचा आहे. प्रत्यक्षात हा व्हिडिओ जुना असून त्यात दिसणारी व्यक्ती जितेंद्र मिश्रा नाहीत. हा व्हिडिओ ‘विकास राणा’ नावाच्या व्यक्तीने ३ नोव्हेंबर २०२५ रोजी शेअर केला होता.

काय व्हायरल होत आहे?

एक्स युझर ‘payalyadav’ ने २ सप्टेंबर २०२६ रोजी व्हायरल व्हिडिओ शेअर करताना कॅप्शनमध्ये लिहिले, “राम मंदिर ट्रस्टचे पहिले CEO म्हणून नियुक्त केलेले निवृत्त एअर मार्शल जितेंद्र मिश्रा आपल्या नियुक्तीचा आनंदोत्सव दारू पिऊन नाचताना दिसत आहेत.”

पोस्टची अर्काईव्ह लिंक येथे पहा.

राम मंदिर ट्रस्ट के पहले सीईओ के रूप में नामित सेवानिवृत्त वायु मार्शल जितेंद्र मिश्रा अपनी नियुक्ति का जश्न मनाते हुए नाचते और शराब पीते हुए नजर आ रहे हैं। pic.twitter.com/Z6Z0NhrrzG

— payalyadav (@payalyadavG) September 2, 2026

तपास

व्हायरल व्हिडिओचे सत्य जाणून घेण्यासाठी आम्ही त्याचे अनेक कीफ्रेम्स काढले आणि ते Google रिव्हर्स इमेजच्या मदतीने शोधले. आम्हाला हा व्हायरल व्हिडिओ ‘Vikash Rana’ नावाच्या व्यक्तीच्या इंस्टाग्राम अकाउंटवर सापडला. हा व्हिडिओ ३ नोव्हेंबर २०२५ रोजी शेअर करण्यात आला होता. तथापि, कॅप्शनमध्ये व्हिडिओमध्ये दिसणाऱ्या व्यक्तीबद्दल कोणतीही माहिती दिलेली नाही.

पुढे तपास करतांना आम्ही Vikash Rana चे इतर सोशल मीडिया अकाउंट्स शोधण्यास सुरुवात केली. आम्हाला दिसले की Vikash Rana ने व्हायरल व्हिडिओमध्ये दिसणाऱ्या व्यक्तीसोबतचे इतर अनेक व्हिडिओ आपल्या यूट्यूब चॅनेलवर देखील शेअर केले आहेत. अशाच एका व्हिडिओमध्ये विकास त्या व्यक्तीला ‘कप्तान साहेब’ (Captain Sahib) म्हणून हाक मारतो.

आम्ही जितेंद्र मिश्रा आणि व्हायरल व्हिडिओमध्ये दिसणाऱ्या व्यक्तीच्या फोटोंची तुलना केली. त्यानंतर दोन्ही फोटो वेगवेगळ्या व्यक्तींचे असल्याचे स्पष्ट झाले.

विश्वास न्यूजने राम मंदिर ट्रस्टचे CEO जितेंद्र मिश्रा यांच्याशी संपर्क साधला. त्यांनी या व्हायरल दाव्याचे खंडन करत सांगितले, “व्हिडिओमध्ये दिसणारी व्यक्ती मी नाही.”

आम्ही हा व्हिडिओ बनवणाऱ्या आणि आपल्या इंस्टाग्रामवर शेअर करणाऱ्या विकास राणा यांच्याशी संपर्क साधला. त्यांनी आम्हाला सांगितले, “व्हायरल दावा चुकीचा आहे. व्हिडिओमध्ये दिसणारी व्यक्ती जितेंद्र मिश्रा नाहीत. हा व्हिडिओ चुकीच्या पद्धतीने व्हायरल केला जात आहे.” तर, ट्रोलिंगच्या भीतीमुळे त्यांनी संबंधित व्यक्तीची ओळख सांगण्यास नकार दिला, परंतु व्हिडिओत दिसणारी व्यक्ती जितेंद्र मिश्रा नाहीत हे स्पष्ट केले.

काय आहे संदर्भ?

‘नवभारत टाईम्स’च्या वेबसाईटवर २ सप्टेंबर २०२६ रोजी प्रसिद्ध झालेल्या वृत्तानुसार, “भारतीय हवाई दलाचे माजी एअर मार्शल जितेंद्र मिश्रा यांची अयोध्येच्या श्रीराम जन्मभूमी तीर्थ क्षेत्र ट्रस्टचे पहिले मुख्य कार्यकारी अधिकारी (CEO) म्हणून नियुक्ती करण्यात आली आहे. जितेंद्र मिश्रा हवाई दलात ३९ वर्षे सेवा बजावल्यानंतर ३० एप्रिल २०२६ रोजी निवृत्त झाले. देशाच्या रक्षणासाठी सुमारे चार दशके सेवा देणाऱ्या जितेंद्र मिश्रा यांना ३००० तासांच्या उड्डाणाचा अनुभव आहे.”

शेवटी आम्ही हा व्हिडिओ चुकीच्या दाव्यासह शेअर करणाऱ्या युझरचे अकाउंट स्कॅन केले. आम्हाला आढळले की युझरला सुमारे दोन हजार लोक फॉलो करतात. युझर मार्च २०२६ पासून एक्स वर सक्रिय आहे.

निष्कर्ष: विश्वास न्यूजने आपल्या तपासात आढळले की, राम मंदिर ट्रस्टचे नवे CEO जितेंद्र मिश्रा यांच्या नावाने व्हायरल होत असलेला व्हिडिओ इतर एका व्यक्तीचा आहे. हा व्हिडिओ जुना असून त्यात दिसणारी व्यक्ती जितेंद्र मिश्रा नाहीत. हा व्हिडिओ विकास राणा नावाच्या एका व्यक्तीने वर्ष २०२५ मध्ये शेअर केला होता.

Fact Check: मोदींनी देवाला पाण्यात बुडवण्याविषयी म्हटले नाही, व्हिडिओ अर्धावट आहे

टॅग्स

• Jitendra Mishra
• Ram Mandir